Die onlangse borskankerbewusmakingsveldtog wat by die Castle Gate Lifestyle-sentrum aangebied is, het mammogramme en borssonars met ’n mobiele eenheid vir vroue toeganklik gemaak. Die 11-dae-lange veldtog is deur Atterbury Trust en Triomf Kliniek, in samewerking met Screen Her Save Her (SHSH) moontlik gemaak.Danelle Strydom van Atterbury Trust en Rosa-Marié Cox Cronjé, direkteur van SHSH, gee meer insig.
Vertel ons meer van Atterbury Trust se verbintenis met Screen Her Save Her.
Een van Atterbury Trust se alumni was by die Screen Her Save Her-inisiatief betrokke en het ons genader om saam te werk. Dit was ’n maklike besluit, want dit bring soveel waarde tot ons vrouekliniek by Triomf, en gemeenskapsbetrokkenheid is een van die kernpilare van Atterbury Trust. Hierdie was ons derde veldtog saam. Screen Her Save Her is ’n nie-vir-wins organisasie wat fokus op die beskikbaarheid van mammogramme vir vroue in Suid-Afrika waar daar ’n behoefte bestaan.
Hoe het die pas afgelope veldtog verloop? Was Castle Gate ’n goeie keuse vir die mobiele eenheid, en hoe het vanjaar se veldtog van vorige jare verskil?
Castle Gate is ’n sentrale en toeganklike ligging in Pretoria, wat dit maklik maak vir vroue om gebruik te maak van die diens. Omdat dit nou al die derde jaar is dat ons dit hier aanbied, het ons begin sien hoe vroue dit in hul jaarlikse gesondheidsroetine integreer. Dit help ook om die belangrikheid van gereelde mammogramme te versterk.
Hoeveel vroue is vanjaar gehelp? Hoeveel was privaatpasiënte en hoeveel is deur die Triomf Kliniek verwys?
Ons het ongeveer 86 vroue gehelp met mammogramme en borssonars. Sewe is vir verdere ondersoeke verwys. ’n Goeie balans tussen privaatpasiënte en kliniekverwysings is gehandhaaf.
Was daar iets besonders wat vanjaar se pasiënte uitgelig het?
Omdat ons jaarliks terugkeer, het ons deurlopende beelding van sommige van die vroue se mammogramme, wat as vroeë opsporing dien. Vroeë opsporing beteken beter behandelingsopsies en uitkomste. Dít is die krag van volgehoue bewustheid en toegang.
Watter terugvoer het julle van pasiënte ontvang? Kan julle ’n storie met ons deel?
Die sukses van so ’n veldtog lê beslis in die ervarings van die vroue self. Een pasiënt het geskryf:
“Ek wil net graag ’n oomblik neem om my opregte dankbaarheid uit te spreek vir die mammogram. Julle sorg en toewyding beteken baie vir my, en ek waardeer opreg al die moeite wat julle gedoen het om seker te maak alles verloop vlot. Julle vriendelikheid en professionaliteit het die ervaring soveel makliker gemaak, en ek is ongelooflik dankbaar daarvoor. Baie dankie vir alles wat julle doen — julle werk maak regtig ’n verskil!”
Hoeveel Triomf Kliniek-pasiënte is sedert die begin van die samewerking gehelp, en watter impak sien julle?
In 2023 is 143 pasiënte gehelp en in 2024 ongeveer 165. Ons droom is om elke jaar meer vroue te bereik en hierdie lewensbelangrike diens toeganklik te maak. Die impak is sigbaar – van verhoogde gesondheidsbewustheid tot tydige mediese intervensie.
Wat hou die toekoms in? Word daar reeds planne beraam vir nog ’n veldtog, en is daar ’n droom om dit uit te brei?
Ons sien dat vroue begin vertroud raak met die mobiele eenheid en die professionele diens wat dit bied. Hulle maak staat op die jaarlikse besoek om hul gesondheid dop te hou. Baie begin al vroeg navraag doen oor wanneer die eenheid weer in Pretoria sal wees. Dis vir ons belangrik om ’n pad saam met elke vrou te stap – ’n pad van vertroue, ondersteuning en gesondheidsprioritisering. Ons droom is beslis om die projek verder uit te brei en meer plekke te bereik.
Sou jy wil betrokke raak, of meer inligting wil hê, kontak gerus vir Danelle Strydom by danelle@atterbury.co.za.
