Versnit 2022

’n Versnit van die beste wyn, keurig gemeng met musiek van formaat en alles saamgebind met die krag van gee. Van omgee vir dié wat minder het as ons.

Met die gewaardeerde ondersteuning van Jean Engelbrecht van Rust en Vrede en Lexus kon Versnit 2022 suksesvol plaasvind. Baie dankie aan almal wat die tiende Versnit by Rust en Vrede bygewoon het.

Oor die afgelope tien jaar van Versnit het daar ook ’n nuwe werkwoordvorm van die woord ontstaan. Nou se dae beteken “om te Versnit” ook om om te gee. Omgee vir minder bevoorregte Afrikaanse jongmense sodat dié met potensiaal met studiebeurslenings gehelp kan word om ook hul beste te kan bereik.

Baie dankie aan ons vrygewige Versnitvriende wat onmiddelik hul harte oopgemaak het met noemenswaardige skenkings aan Atterbury Trust, sodat nog meer studente in die toekoms gehelp kan word.

As jy ook ’n bydrae wil maak, klik hier, want ons weet jy gee ook om: https://atterburytrust.org/skenk-nou/

Alles in die gees van om te Versnit.

Klik ook gerus op die onderstaande skakel vir foto’s van vanjaar se Versnit.

 Louis van der Watt

Versnit 2022 album

Versnit 2020

Om te Versnit is om te gee. Gewoonlik is ’n versnit ’n fyn vermenging van verskillende druiwe kultivars om tussen die beste variante ’n nuwe smaak sensasie te skep. Maar dan is daar Versnit, ’n jaarlikse vermenging van die beste Afrikaanse kunstenaars, die beste geselskap op die lowergroen grasperk van die beste wynplaas, alles vermeng met ’n glasie van die beste wyn. Oor die nege jaar van Versnit het daar ook ’n nuwe werkwoordvorm van die woord ontstaan. Nou se dae beteken “om te Versnit” ook om om te gee. Omgee vir minder bevoorregte Afrikaanse jongmense sodat dié met potensiaal met studiebeurse gehelp kan word om ook hul beste te kan bereik. Versnitvriende het soos gewoonlik op Saterdag, 18 Januarie 2020 by Rust en Vrede ’n musiek-piekniek van formaat gehou. Die wind het gewaai, ja, maar die nuus dat dit ook in die Karoo reën het dié klein ongerief mooi in perspektief gestel. Met die gewaardeerde ondersteuning van Jean Engelbrecht van Rust en Vrede en Lexus kon Versnit 2020 suksesvol plaasvind. Suksesvol nie net omdat dit weer ’n uitsonderlike geleentheid was nie, maar ook omdat die Versnitvriende weer hul harte oopgemaak het met noemenswaardige skenkings aan Atterbury Trust, sodat nog meer studente in die toekoms gehelp kan word. Alles in die gees van om te Versnit. As jy ook ’n bydrae wil maak, gebruik hierdie skakel, want ons weet jy gee ook om: https://atterburytrust.org/skenk-nou/
Versnit 2020 album

Versnit 2019

Na die somervakansie is die Atterbury Trust-hoogtepunt in Januarie beslis Versnit. Gashere Louis van der Watt van Atterbury, Jean Engelbrecht van Rust en Vrede en die gewaardeerde borg Calvyn Hamman van Lexus het uitgenooide gaste op die pragtige lowergroen grasperk van Rust en Vrede welkom geheet in die laatmiddag sonskaduwee van Stellenbosch se asemrowende Helderberg.

Nataniël het vir die eerste keer Versnit se uitgelese gaste soos Minki van der Westhuizen, Deon Meyer, Victor Matfield, Jean de Villiers en besigheidsleiers soos Laurie Dippenaar, Jannie Mouton, Whitey Basson, Johan van Zyl, Paul Harris en GT Ferreira met sy unieke vertoning en pragtige kostuums vermaak. Karen Zoid het die gehoor na hul asems laat snak met haar robuuste “mashup” van Annelie van Rooyen se Neem my op vlerke en Metallica se Enter Sandman.

Die kitaarkenner Loki Rothman het allerhande klanktruuks op sy kitaar uitgehaal. Theuns Jordaan, Charl du Plessis, Corlea en Ricus Nel het opgetree en die gaste vermaak met van hul bekende nommers en ou gunstelinge uit die breë musiekwêreld. Die Versnit Orkes met net die heel beste plaaslike talent soos Matthys Maree, Mauritz Lotz, David Klassen en Denny Lalouette het soos gewoonlik hul begeleiding met oorgawe gelewer.

Versnit 2019 was voorwaar ‘n voorkeur samekoms van sang, samesyn en, natuurlik, ‘n heerlike glasie wyn.

Versnit se doelwit is om fondse in te samel vir Atterbury Trust sodat ons nog meer kinders kan help om ná skool verder te studeer.

Versnit 2019 album