Versnit 2019

Na die somervakansie is die Atterbury Trust-hoogtepunt in Januarie beslis Versnit. Gashere Louis van der Watt van Atterbury, Jean Engelbrecht van Rust en Vrede en die gewaardeerde borg Calvyn Hamman van Lexus het uitgenooide gaste op die pragtige lowergroen grasperk van Rust en Vrede welkom geheet in die laatmiddag sonskaduwee van Stellenbosch se asemrowende Helderberg. Nataniël het vir die eerste keer Versnit se uitgelese gaste soos Minki van der Westhuizen, Deon Meyer, Victor Matfield, Jean de Villiers en besigheidsleiers soos Laurie Dippenaar, Jannie Mouton, Whitey Basson, Johan van Zyl, Paul Harris en GT Ferreira met sy unieke vertoning en pragtige kostuums vermaak. Karen Zoid het die gehoor na hul asems laat snak met haar robuuste “mashup” van Annelie van Rooyen se Neem my op vlerke en Metallica se Enter Sandman. Die kitaarkenner Loki Rothman het allerhande klanktruuks op sy kitaar uitgehaal. Theuns Jordaan, Charl du Plessis, Corlea en Ricus Nel het opgetree en die gaste vermaak met van hul bekende nommers en ou gunstelinge uit die breë musiekwêreld. Die Versnit Orkes met net die heel beste plaaslike talent soos Matthys Maree, Mauritz Lotz, David Klassen en Denny Lalouette het soos gewoonlik hul begeleiding met oorgawe gelewer. Versnit 2019 was voorwaar ‘n voorkeur samekoms van sang, samesyn en, natuurlik, ‘n heerlike glasie wyn. Versnit se doelwit is om fondse in te samel vir Atterbury Trust sodat ons nog meer kinders kan help om ná skool verder te studeer. Klik hier vir meer inligting oor hoe om te skenk, want ons weet jy gee ook om

Atterbury Nasionale Klavierkompetisie 2018

Vanjaar se kompetisie was weer ’n viering van uitstaande talent en uitnemendheid. ’n Totaal van 41 deelnemers, ’n allemintige 19 van hulle jonger as 12 jaar, voorspel groot dinge vir die toekoms van die kompetisie. Baie geluk aan die 18-jarige Colette du Toit, ’n Affie van Pretoria wat sedert 2011 nog elke jaar deelgeneem het, en wat vanjaar in die middel van haar matriekeksamen vasgebyt het en hierdie gesogte kompetisie vir jong pianiste gewen het.

Versnit 2018

Die jaarlikse Versnitkonsert op die wonderskone Rust en Vrede landgoed, ten bate van Atterbury Trust, het op 20 Januarie 2018 plaasgevind. Almal is dit eens, dit was weer ‘n sielsbevredigende, genotvolle geleentheid vir samesyn, die beste Afrikaanse musiek en heerlike wyn. Baie dankie ook aan die ruimhartige bydraes wat ons reeds van gaste ontvang het. Ons het ook ‘n gedrukte Versnit Herinneringsboek (2012 – 2017) aan gaste uitgedeel. Kyk hier na die boek: https://atterburytrust.org/versnit-herinneringe-boek/

Hoërskool Nelspruit kultuursentrum

Atterbury Trust is deur die Trust vir Afrikaanse Onderwys (TAO) genader om die projekbestuur van hulle skole-infrastruktuur projekte te hanteer. Ons het vroëer vandeesmaand saam met die Laeveld feesgevier toe ‘n nuwe veeldoelige kultuursentrum by Hoërskool Nelspruiëëskoo, amptelik geopen is.

Versnit 2017

Versnit 2017 was ’n viering van die beste van Suid-Afrikaanse kunstenaars – Coenie de Villiers, Stef Bos, Steve Hofmeyer, Corlea Botha, Lize Beekman en nuweling Brendan Pyper – in ’n vertoning uitstekend aanmekaargesit deur Matthys Maree en Alexa Strachan. Coenie de Villiers het vanjaar die Versnittoekenning ontvang vir sy besondere bydrae tot die Afrikaanse taalskat. ’n Groot Atterbury Trust-dankie aan Jean Engelbrecht en sy bekwame Rust en Vredespan, wat sy pragtige werf, wingerd én wynkelder oopstel, en gasheer is vir meer as 600 uitgesoekte gaste. ’n Groot dankie aan Calvyn Hamman vir Lexus se bydrae as medeborg van Versnit 2017. Die Versnitgaste dra ook ruimhartig by en ons wil een en elkeen wat ’n bydrae gemaak het, hartlik bedank. Ons kan u verseker dat elke bydrae tot die beswil van ons groeiende aantal Truststudente aangewend word.

Atterbury Nasionale Klavierkompetisie 2016

Baie geluk aan al ons wenners van die Atterbury Nasionale Klavierkompetisie. Julle is almal sterre! Die algehele wenners: 1ste – Swunhtat Oo 2de – Cindy Ju 3rde – Louis Nel 0/19 – Swunhtat Oo 0/15 – Beate Boshoff 0/12 – Dane van Graan Spesiale pryse: Beste Barok – Louis Nel Beste Klassiek en Suid Afrikaans – Cindy Ju Beste Romanties en Modern – Swunhtat Oo Claudine van Breda het ook ’n oorkonde ontvang vir haar toewyding aan klavieronderrig.

Versnit 2016

Vir die vyfde agtereenvolgende jaar het Atterbury, Attacq en wynmaker Jean Engelbrecht van Rust en Vrede saamgespan om ‘n onvergeetlike aand in die Stellenbosse wynlande aan te bied. Versnit 2016 was soos in vorige jare ‘n wonderlike samesmelting van die beste in Afrikaanse musiek, die beste wyne van die streek, ‘n asemrowende buitelug-ligging en ‘n geselskap van vriende met groot harte. Die doelstelling? Om die Atterbury Trust se werksaamhede vir die jaar ‘n geldelike hupstoot te gee, en weer eens was die sakke diep en die bydraes ruimhartig.

Atterbury Nasionale Klavierkompetisie 2015

So lyk vanjaar se Atterbury Klavierkompetisiewenners:

Algehele 1ste plek: Leo Gevisser
Alghele 2de plek: Rosemarie Lemmer
Algehele 3de plek: Cindy Ju
Wenner 12 jaar en jonger: Leo Gevisser
Wenner 15 jaar en jonger: Louis Nel
Wenner 19 jaar en jonger: Rosemarie Lemmer
Beste uitvoering van ’n Barok werk: Leo Gevisser
Beste uitvoering van ’n Klassieke werk: Rosemarie Lemmer
Beste uitvoering van ’n Romantiese werk: Landi Schaap
Beste uitvoering van ’n Moderne werk: Leo Gevisser
Beste uitvoering van ’n Suid-Afrikaanse werk: Swunhtat Oo

Verlore In Stof amptelike openingsaand 5 Junie 2014

Versnit 2015

Die Atterbury en Rust en Vrede Versnit is vanjaar vir die vierde keer deur Rust en Vrede, Atterbury en Attacq aangebied. Die spesiale geleentheid, wat ten bate van die Atterbury Trust aangebied word, het oor die afgelope paar jaar soos ‘n goeie versnitwyn ontwikkel en in statuur gegroei. Talentvolle Afrikaanse kunstenaars — sommige al volksbesit oor jare en ander splinternuut — het die uitgelese gehoor vanjaar meegesleur op ’n nostalgiese reis.

Wanneer Suid-Afrika se beste Afrikaanse kunstenaars bymekaarkom om ’n vertoning soos Versnit aan te bied, is dit ’n voorreg om na hulle te kan luister. Om dit saam in die wonderlike natuur by Rust en Vrede te geniet, is voorwaar ’n geleentheid om te onthou.

Ons het na ou, ou liedjies van Laurike Rauch geluister. Liedjies soos Blou Kafee en Nostalgie het ons teruggeneem na tye van mooi wense wens en drome droom. Elvis Blue het ons laat terugverlang na die dae toe ons jonk was. Steve Hofmeyr het ons herinner aan die vrou agter elke man.

Tussendeur het ons verder die pad met Amanda Strydom saamgeloop. Jannie Moolman het ons laat dink aan swaarkry as die wintermaande nader kruip op die plaas en eensklaps is ons verras deur die nuweling Joshua na die reën se Sekelmaan en Lig op die Horison.

Riana