Boishaaier Tyresse Abrahams het onlangs MOI se eerste Debra Meyer Entrepreneurskap-wisseltrofee gewen vir sy ondernemingsgees met sy eierboerdery. Hy vertel Paarl Hoër Jongenskool was sy kinderdroom, en vanjaar is hy daar in matriek, danksy die MOI-program. Ons hoor meer by Tyresse en MOI programbestuurder Jenene Petersen.

Tyresse, vertel ons meer van die prys wat jy gewen het? Moes jy inskryf of hoe het jy in aanmerking gekom hiervoor?
Tannie Jenene het my gevra vir ’n paragraaf oor my besigheid; ek het gedink sy soek dit dalk net om vir iemand aan te stuur, en het nie weer daaraan gedink nie. En toe, op ons jaarlikse MOI Oriënteringsdag vroeg in Januarie vanjaar, kom die verrassing, toe Tannie Jenene aankondig dat hulle ’n spesiale nuwe entrepreneursprys wil aankondig… Toe sy begin vertel van die besigheid, besef ek sy praat van my! Die Debra Meyer Entrepreneurskap-wisseltrofee staan tans by ons in die voorhuis, en hoewel my besigheid nog klein is, is ek baie trots op die erkenning van my harde werk  en  sakevernuf wat dit verteenwoordig!

Dit is die eerste jaar wat MOI dié toekenning uitreik en ek is die trotse ontvanger daarvan.

Vertel ons meer oor jou eierboerdery?
Ek het begin deur eiers aan te koop en dan te herverkoop, maar het onlangs in my eie hoenders belê, twee lêhoenders aangekoop en die hok waarin hulle slaap, vergroot. Ek het ook 11 werfhoenders. Tans verkoop ek nog hokvrye (“freerange”) eiers wat ek van betroubare verskaffers kry teen tussen R70 en R90 vir 30 eiers. My verkope per week wissel en daar is goeie en stadige weke, maar ek het genoeg wins gemaak en gespaar dat ek verlede jaar ’n deel van die onkostes kon dek van ’n rugbytoer na Skotland  waarvan ek deel was.

Hoe lank al is jy deel van die MOI program, en wat beteken dit vir jou as matrikulant om ’n MOI beurshouer te wees?
Aan die einde van 2025 sal dit vyf jaar wees. As klein seuntjie was dit my droom om ’n Boishaaier te wees, maar weens finansiële uitdagings het ek gedink dit sal maar net ’n droom bly.  Ek is vol dankbaarheid teenoor die MOI-program dat ek myself vandag ’n trotse Boishaaier kan noem. Niks hiervan sou moontlik gewees het sonder die goedheid van ons hemelse Vader en my godvresende ouers nie – ek is so gelukkig dat my pa my besigheidsafrigter is. Ek sal MOI ewig dankbaar wees vir die geleenthede wat hulle vir my bied.

Wat sou jy uitsonder as hoogtepunte van die afgelope jaar, en waarna sien jy uit, wat MOI betref?
Die bande van vriendskap wat oor die jare opgebou is, is sekerlik die hoogtepunt; ek gaan hierdie vriende vir ’n leeftyd hê.  Ek sien baie uit na ons volgende leierskapkamp wat elke jaar ’n groot verrassing en bederf is. Die sosiale kuiersessies saam met almal en de wegbreek in die mooi natuur wat die Wes-Kaap bied is so besonders.

Ek wil graag my heel beste gee in my matriekjaar en myself, my ouers en MOI trots maak met goeie matriekresultate.

Jenene, hoe benader julle kompetisies by MOI?
Ons monitor en gesels gereeld met die leiers oor leierskap en entrepreneurskap. Ons is bevoorreg om een van Afrika se suksesvolste entrepreneurs, Francois van Niekerk, as MOI se stigter te hê, wat ’n wonderlike hulpbron is.

MOI is nou in die sesde bestaansjaar en ons groei in leerdersgetalle, maar ook eksponensieel in die leerders se potensiaal. Die Entrepreneurskapkompetisie is nuut en Tyresse se toekening was die eerste stap in dié proses.

Ons beplan ‘n aantal aksies, soos ‘n ontbyt saam met Francois van Niekerk waartydens hy vir die leerders meer oor sy boek, “Business with a purpose”, sal vertel. Ons stigter se persoonlike verhaal van entrepreneursvernuf is ‘n uitstekende beginpunt vir ‘n reeks waarin ons goeie stories met die leerders wil deel om hulle te inspireer.

Ons reël ook ‘n praatjie met Matthew Blauw wat sy entrepreneurverhaal sal deel en hoe hy die Maak my ‘n Miljoener kompetisie in 2023 gewen het. Ons kompetisie skop dan in Junie af, en die deelnemers sal moet woeker met kontant wat aan hulle voorgeskiet word om ‘n besigheid te begin. Die wenner sal op die MOI leierskapskamp wat vanjaar in die Oktober skoolvakansie, in Franschhoek plaasvind, bekend gemaak word.

En Tyresse, wat is jou droom vir jouself en jou besigheid? Waar hoop jy om oor 10 jaar te wees?
My droom is om my besigheid te groei sodat ek my eie produkte produseer en verkoop. Ek wil graag na skool landbou gaan swot by Elsenburg en ’n graad in plant- en dierproduksie verwerf. Daarna wil ek graag vir ’n rukkie oorsee gaan boer ter wille van my CV en om my kennis te verbreed, waarna ek sal terugkeer om in Suid Afrika te kom boer.

Ek wil graag my eie kommersiële veeplaas besit en suksesvol bedryf. Tussendeur wil ek nog baie rugby speel en ook kwalifiseer as ’n elektrisiën, en vir myself ‘n sterk loopbaan bou in die elektriese bedryf.

Hou maar dop, hierdie jongman gaan nog ver gaan. Jy kan ook bydra om meer jongmense se drome waar te maak, deur te skenk aan MOI op Donasiewinkel.