Louis van der Watt en Francois van Niekerk het destyds met die stigting van Atterbury Property die besluit geneem om ’n derde van die aandele in die Atterbury Trust te sit. Hierdie ruimhartige visie het oor die afgelope 27 jaar ’n baken van hoop geword vir soveel van ons land se mense.

Atterbury Trust se hartklop is die krag van opvoeding, bevordering van kuns en kultuur en die ondersteuning van minderbevoorregte Afrikaanse gemeenskappe.

Ek was bevoorreg om vanaf 1998, met die toekenning van die eerste ses beurse, deel te wees van die Trust-storie van omgee en hoop. Dit is ’n goeie storie wat gaan oor jongmense met groot drome; oor swaarkry en geld wat nie daar was om die drome waar te maak nie, maar dit het in byna elke geval ’n gelukkige einde. Ons kan vertel van vasbyt, hard werk en kanse vat. Die graad aan die einde is dikwels die eerste een in ’n familie. Elk van ons bykans 940 beursstories vertel van die kans om verder te studeer, maar ook om te groei – as leier op universiteit, op die sportveld, as volwaardige mens wat ’n bydrae tot die samelewing kan lewer. Ons beursfamilie floreer met bykans 700 alumni wat vandag hul plek in die Suid-Afrikaanse of oorsese beroepswêreld vol staan in professionele beroepe – hetsy as onderwysers wat wéét hoe dit voel om te min te hê en nou ’n positiewe rol speel in soveel kinders se lewens, ingenieurs, rekenmeesters, wetenskaplikes, argitekte of dokters wat hul medemens met toewyding dien.

Die Fairtree Atterbury Teater bied sedert 2011 aan kunstenaars en gehore ’n wêreldklasplatform waar die beste vermaak uitgevoer en geniet kan word. Welwillendheid vier jaar na jaar hoogty tydens Versnit met fantastiese Suid-Afrikaanse kunstenaars wat telkens ’n uitgelese gehoor op Rust & Vrede betower.