Ons mense

Ons is die som van ons mense… en danksy elkeen se toegewydheid is die Atterbury ketting baie sterk.

 

10 Vrae vir Zahn Hulme, bestuurder van die Atterbury Trust

Zahn21. Wat is jou rol by die Atterbury Trust?
Ek staan uitvoerend aan die hoof van die Atterbury Trust; ek inisieer nuwe projekte, koördineer die dag-tot-dag werksaamhede van die Trust… maak seker dinge gebeur.

Dit wat ek by die Trust doen, voel nie regtig soos werk nie, want dit stel my in staat om ‘n verskil te maak. Ek glo ons mense se doel op aarde is om God se hart en hande, oë, ore en voete hier op aarde te wees. Die Trust is vir my ‘n instrument om mense te mobiliseer en geleenthede te gee om ‘n beter lewe vir hulself te skep.

2. Wie is Zahn by die huis?
Ek is al vir amper 23 jaar getroud met Alten – my geesgenoot en klankbord; hy is regtig iemand met wie ek die lewe wil deel. Ons het twee amazing tienerseuns, Alstaedt (17) en Rein (14), oor wie ek mal is, wat ons langs die sportveld hou, elke naweek!

3. Waar het jy grootgeword en skoolgegaan?
Ek is gebore in Vryheid, KZN, het daar my skoolloopbaan voltooi, daarna by Tuks BCom Rek studeer, en my klerkskap by Deloitte in Pretoria voltooi om as GR(SA) te kwalifiseer.

4. Voltooi die sin: Ek weet ek is Afrikaans want… Dis die taal waarin ek dink, droom en doen!

5. Hoe lyk jou droom Sondagmiddagete?
‘n Lekker stukkie kabeljou met groente en slaai iewers langs die see op ‘n somersdag in Wildernis.

6. Wat is jou gunsteling vakansie-herinnering?
Ons gesin was in 2010 in Frankryk op ‘n barge-vakansie met goeie vriende – ek sal die lekker lag en lekker eet met al die mooi rondom ons nooit vergeet nie.

7. Noem drie bekendes, lewend of nie, wat jy graag sal wil nooi om ‘n lekker bord boerekos saam met jou te geniet?
Moeder Teresa – ek sal haar wou vra wat het vir haar hoop gegee.

Madiba – van hom sou ek wou weet wat het hom in staat gestel om onvoorwaardelik te vergewe.

Lize Beekman – ek wil by haar leer om gevoelens en emosies so goed te kan verwoord in woorde wat mense aanraak.

8. Watter tegnologiese uitvinding wens jy wil in jou leeftyd gebeur?
Dat ‘ n mens ‘n virtuele kloon (of twee!) van jouself kan skep wat soos jy dink en doen, wat jou kan help om jou werk gedoen te kry.

9. Watter historiese gebeurtenis het ‘n blywende indruk op jou gemaak?
Die Tweede Wêreldoorlog – ek het al soveel boeke daaroor gelees en kan steeds nie verstaan dat mense soveel onreg kon pleeg teenoor ander rondom hulle nie. Dieselfde met die Boereoorlog. Wat is dit in mense wat ander bewustelik leed wil aandoen en onderdruk?

10. Terug by die Atterbury Trust. Watter koerantopskrif oor die Trust sou jy graag wou sien?
“Atterbury Trust ken 1 miljoen beurse toe!”

Atterbury Trust gee hoop aan kinders met deursettingsvermoë – ek is tans besig om halfjaarpunte van ons huidige 149 studente te ontvang en dit gee my soveel vreugde om te sien hoe die studente hulle kanse gebruik. Ek hou so baie van hierdie seënbede van St Francis van Assisi:

Mag die Here jou seën met ongemak oor maklike antwoorde, halwe waarhede en oppervlakkige verhoudings sodat jy uit die diepte van jou hart kan leef;

Mag die Here jou seën met woede oor onreg, onderdrukking en die uitbuiting van mense sodat jy kan werk vir geregtigheid, vryheid en vrede;

Mag die Here jou seën met trane om te stort vir mense wat pyn, verwerping, honger en oorlog ervaar sodat jy ‘n hand kan uitreik en hulle pyn in blydskap kan verander.

En mag God jou seën met genoeg dwaasheid om te glo dat jy ‘n verskil kan maak in hierdie wêreld, sodat jy dinge sal kan doen wat ander mense dink nie gedoen kan word nie.”

 

10 Vrae vir Louis van der Watt, die man agter die Atterbury Trust

Louis21. Wat is jou rol by die Atterbury Trust?
Ek is saam met Francois van Niekerk die mede-stigter.

2. Wie is Louis by die huis?
Ek is al vir amper 23 jaar getroud met Celesté en het twee kinders, Petronel, 17 en Philip, 14.

3.Waar het jy grootgeword en skoolgegaan?
Ek is in Stellenbosch gebore en het in Pretoria grootgeword en skoolgegaan by Laerskool en toe Hoërskool Menlopark

4. Voltooi die sin: Ek weet ek is Afrikaans want…..dis wat ek praat!

5. Hoe lyk jou droom Sondagmiddagete:
Braaivleis en pap.

6. Wat is jou gunsteling vakansie-herinnering?
Elke Desember in ons houthuis by Keurbooms.

7. Noem drie bekendes, lewend of nie, wat jy graag sal wil nooi om ‘n lekker bord boerekos saam met jou te geniet?
Nelson Mandela, Koos de la Rey en Jonathan Jansen. Ek wil hulle graag om ‘n tafel kry om al ons land se probleme op te los.

8. Watter tegnologiese uitvinding wens jy wil in jou leeftyd gebeur?
Iets wat handleidings onnodig maak! Met hierdie uitvinding sal daar geen handleidings wees om te bestudeer nie, mens sal net weet hoe goed werk…

9. Watter historiese gebeurtenis het ‘n blywende indruk op jou gemaak?
Nie een gebeurtenis nie, maar liewer hoe Afrikaners, soms teen alle logika in, deur die jare regkry om elke keer bo uit te kom.

10. Terug by die Atterbury Trust. Watter koerantopskrif oor die Trust sou jy graag wou sien?
“Atterbury Trust – na 100 jaar steeds ‘n sukses!”

 

8 Vrae vir Francois van Niekerk, medestigter van Atterbury

Francois1. Wat is jou rol by die Atterbury Trust?
Mede-stigter en trustee

2. Wie is Francois by die huis?
Getroud met Miems vir 51 jaar, het een dogter, Carla, ‘n skoonseun, Antoin en drie kleindogters, Mia, Arlene en Claudi.

3. Waar het jy grootgeword en skoolgegaan?
Gebore in die Paarl, eers plaas-skool en toe Hoër Jongenskool, Paarl.

4. Voltooi die sin: Ek weet ek is Afrikaans want… my hart klop so.

5. Wat is jou gunsteling vakansie-herinnering?
Die amper 20 jaar wat ek vakansies op Plett se baai met my Hobie kon seil.

6. Watter tegnologiese uitvinding wens jy wil in jou leeftyd gebeur?
n Tydmasjien om net so ‘n bietjie briek aan te draai. Daar is nog heelwat om te doen.

7. Watter historiese gebeurtenis het ‘n blywende indruk op jou gemaak?
Die Tweede Wêreldoorlog. Die uitslag kon baie amper anders gewees het en dit sou ons hele bestaan op ‘n heeltemal ander spoor gesit het.

8. Wat is jou hoop vir die Atterbury Trust?
Dat ons die Trust se bewese sukses kan vermenigvuldig deur uitbreiding en die skep van ander soortgelyke trusts wat jaarliks ‘n paar duisend jong Suid Afrikaners tot ‘n betekenisvolle lewe kan help.